انت الدنيا

دكتور محمد الشطى
مهما الدنيا تاخدنى بعيد
بافضل برضه قريب منك
مهما قساوة الكون حاتزيد
عمرى ماحقدر ابعد عنك
مهما اتغرب ارجع ليكى
وقلبى بيفضل ملك اديكى
وباشوف نفسى كمان فى عنيكى
وعمرى ما احس بانى وحيد
......
مهما اشوف اجناس مولامح
مهما اعيش مع سحر عيونهم
بالقى عنيكى بلاد ومطارح
والقى ملامحك ساكنة جبينهم
وازاى احس وقلبى معاكى
وفى دقاته يقول باهواكى
مانتى اميرتى وانتى ملاكى
وحبك بيخلينى سعيد
....
لو حايخاف الطير من عشة
يبقى ازاى حايلاقى امان
والانسان لو خاف من رمشه
يبقى مالوش فى الدنيا مكان
وانتى العش وقلبى الطير
انتى الرمش وقلبى اسير
وقلبى بيقرح بيكى كتير
فرحة طفل حزين بالعيد