لما بتنكرى ضوء الشمس
يبقى ازاى حاتحسى بهمس
يبقى ازاى حاتحسى كلامى
لما اقوله من غير حس
اصل الشمس
واضحة كتير عن معنى سكوت
معنى كلام هربان من الصوت
معنى لحلم وليد جوايا
بس وليد مستنى الموت
موت علشان شايفك نسياه
رغم ان انتى اكيد عرفاه
ابن وعارف انك امه
ةاللى ماثر فيه ناكراه
ناسية الدم السايل فيكى
دم ولادك مش اعاديكى
وبدال ما تضمدى فى جراحهم
من افعالهم شيلتى اديكى
مهما بيقسى الابن على امه
تلقى فى جرحه الام تضمه
كلمة اه منه بتوجعها
وبتتمنى تشيل من همه
وانتى اتحول حضنك قبر
وطعمك زى الحنضل مر
واحنا نمد ادينا لخيرك
نلقى اديكى مادة الشر
كل العالم شاف واتفرج
اننا حق ومش بنهرج
سقف كل العالم لينا
وانتى بايدك كله اتخرج
ايوة اتخرج لكن ساكت
برصاص خرم حتى الجاكيت
وانتى بقيتى غريبةعليه
هى مشاعرك منك ماتت
كنت باقول انك ولادة
وابعد عنك احب زيادة
وارجع الاقى الناس بتفرق
فناجين فيها القهوة السادة
خايف تصحى بعد ما نخلص
بعد مادم المصرى حايرخص
تتحولى لقرافة كبيرة
واللى ما مات مقتول راح يفطس
وما يبقاش حى الا رصاص
يضرب جوة قلوب الناس
والناس فيكى ياعينى غلابة
وكله بيشرب نفس الكاس
ليست هناك تعليقات:
إرسال تعليق