قصيدة مصر

الشطى

ميم والره حاضنين الصاد
علشان يعملوا كلمة مصر
وكل النار اخرتها رماد
وبكره يروح للشعب النصر
ايوة يا شعب اصيل يا مناضل
ياللى صبرت سنين وسنين
عدا الصعب خلاص والفاضل
يرجع تانى تاريخ حطين
نرسم بكرة الجاى بايدنا
يبقى ولادنا كمان فى امان

مش حانعيش اغراب فى بلدنا
ولا راح نرجع شعب جبان
كتم الصوت كان مرر حلقى
كنت بخاف من كف الظلم
والمستقبل ضيق خلقى
وكنت باحسه بعيد الحلم
بس خلاص الحلم اتحقق
ايوة خلاص يا شباب يا عظيم
خلوا العالم كله يصدق
ان المية تحت الريم
وان تاريخنا الجاى حالفين
نكتبه كله بخط ادينا
ايوة خلاص نطق الملايين
مصر حاتفضل غالية علينا
دم الشهدا علينا امانة
واشهد يا ميدان التحرير
روحهم طير بيقول ويانا
مصر حاتفضل بينا بخير