فتحت القلب

الشطي

فتحت القلب فتشته
لقيتنى حد كله عيوب
وكل الماضى انا عشته
اغلط بس بارجع اتوب
تاخدنى الدنيا دوامة
تنسينى انى توبت خلاص
لقيت غلطات كتير ياما
وحسيت اللى فات انداس
ورغم انى باصلى واصوم
وعندى ضمير بيوجعنى

ولكن ايه يفيد اللوم
وقلبى عمره ما منعنى
وده بيقول ايمانى ضعيف
ايمان بالشكل من برة
يحسسنى انى غلطى خفيف
واعيد الغلطة كام مرة
وقفت شوية مع نفسى
لقيت قلبى بيتقطع
يقول بكرة حاتندسى
وجوة القبر شىء افظع
رفعت اديه من تانى
دعيت ربى يسامحنى
وعارف ان انا جانى
دعيته رحمته تساعنى
وقلت يا رب انا انسان
وانت عليم باسرارى
طلبت الرحمة والاحسان
والقى فى جنتك دارى
مافيش غيرك حايرحمنى
ولا يقدر على القدرة
يا رب غلطت سامحنى
ونسينى اللى فات بكرة
انا عبدك ضعيف وذليل
وباعلن توبتى قدامك
ونفسىنهار يزيح الليل
واعيش العمر خدامك
وعايز م اللى يقرالى
يراجع نفسه كام نوبة
قوام وف وقتك الحالى
اندم اعلن التوبة
وفكر فى اللى كان فرعون
وداس ع الناس بافعاله
وشوف حكمة اله الكون
لانفعه جاهه ولا ماله