عارفة حاقولك تانى انا خايف
كلمة اه مش عايزة شفايف
خايف لكن خوفى عليكى
لما وريدك يصبح ناشف
بس بحبك حاعمل ايه
حبك شىء ماقدرش اداريه
ازعل منك وارجع اصفى
لكن وجعى مش حاخفيه
ربى ادانى كلام وحاقوله
لجل ما يرمى القلب حموله
يرمى كلام ع الورقة ويشكى
ويسهر ليلك كله بطوله
ايوة حروف لكن من قلبى
يمكن باقسى بس بحبى
بارجع اقولك تانى بحبك
وادعى تروقى ويشهد ربى
اسمعى بس كلامى وحسى
ولما اتكلم اسمعى حسى
كنت زمان بكتب وتردى
لما اشكيلك حتى بهمسى
بس مش انتى اللى انا حبيتها
واللى فرحت لما لقيتها
انتى شبهها بس غريبة
حتى غريبةكمان على بيتها
بصى لزرع ف ارضه بيبكى
كل فروعه بتصرخ تشكى
لما المية تغيب وتطول
تطرح زرع بشكل اميركى
ودنك ليه صبحت من طين
حتى التانية ساددها عجين
حتى عيونكمش شيفانا
حسى بحرفى حاتلقى انين
فوقى قوام انا مش اراجوز
لجل ما ترمى سودانى ولوز
انا انسان من وجعه بيبكى
نفسه يلاقى فى ارضك موز
انا خلصت خلاص وحاسيبك
هو ده قدرى وهو نصيبك
حاختم بس حاقولك حاجة
حنى على الغلبان من جيبك
#محمد_وفيق_الشطى
ليست هناك تعليقات:
إرسال تعليق