محمد وفيق الشطى
استمعنا
كل واحد عنده معنى
يعنى اى كلام حاقوله
مش حاينفع يبقي مغنى
اصله حرف جريح بينزف
لما يلقى الحالة تقرف
واللى حرفه ياما صلح
مش حايقدر بكرة يتلف
طعم كلمة اه ف حلقى
كل شىء ضيق لى خلقى
والقتيل غرقان فى دمه
مش حايصحى مهما ترقى
كل شىء حوالينا ضلمة
كل خضة بنادى يامه
رغم انى باشوف تمام
عشت فيكى زى الاعمى
واتفقنا الكلمة معنى
بس غيرت اتفاقنا
كله هرى ف هرى فاضى
والنهيق بقى احلى مغنى
الخروف بيقول يا ليل
كل مرة حاجيب دليل
يعنى برضه ازاى يمأمأ
وكل ماء عايزالها نيل
بس برضه لسه حاجة
مش طيابة ومش سذاجة
حاجة بتبدل حياتنا
عاشت الناس فى اللزاجة
مهما بكتب مين حايقرا
مين حايفهم مين حايدرى
كل شاعر خبى قلمه
وساب ورقته لاى بقرة
نجم مات والخال كمان
والمكان مابقاش مكان
الاغانى حتى تقرف
دب رزع ومهرجان
اصل معنى الكلمه سره
لما ينطق ذل قهره
واما يبقي القلب حاسه
بكل حلوه وكل مره
ليست هناك تعليقات:
إرسال تعليق