يا نيل يابو طعمين

الشطى

يا نيل يابو طعمين
تعبنا من مُرك
توهنا مابين شطين
وحافظنا على سرك
اديت لناس الشهد

وناس مافيش حاجة
والحيل خلاص انهد
ولا خدت ولا حاجة
ع الشط كان مسرحك
واحنا عرايس خيط
ولساك اهو فى مطرحك
والزمر اخره طيط
وشوش كتير شوفتها
فى الثانية قول الفين
ناس غيرت جلدها
وناس تبيع العين
علشان رغيف بنموت
وانت بتروى القمح
يبقى اوطى الصوت
حتى فى اوان الصرخ
ياما صبرنا كتير
قولنا حاتتعدل
والواطى يبقى كبير
واحنا بنتقتل
ساعات كتير م الجوع
وساعات مافيش دكتور
والحل لو فى دموع
حانبكى لك بالدور
واسمع كلام موجوع
من قلب عاش شايل
وجسمة كله ضلوع
م اللى لقاه مايل
واللى ابتلى بالداء
مالقاش طبيب يداوية
رفع شعار فقراء
شتموه وضحكوا عليه
قالوا الدوا بفلوس
ودى مش تكية ابوك
روح ياللا ياكلك سوس
انت واللى جابوك
عايز علاج ببلاش
من غير ماتدفع قرش
يابنى خلاص مابقاش
احنا فى زمان الغش
احنا الفقير نرميه
علشان عددنا زاد
ومنين بقى نقضيه
لازم الفقير يتباد
خلاص يا عمى بقى
حركنى بخيوطك
شيلنى قوام م الشقى
تعبت من شوطك
انا نفسى افرح قوى 
واقول حاينصفنى
ومالقاش فى لحظة القوى
داسنى وفعصنى