كله زفت
خلاص قرفت
انت ياسطى ياللى سايق
ماشى ولا تكون وقفت
قلت جوعوا واحنا جوعنا
حتى بص تشوف ضلوعنا
ايه اللى فاضل لينا تانى
حتى خلصت اهو دموعنا
اللى جاى مافيهوش سكوت
اللى جاى بالحرف مووت
تفرق ايه ويه اللى ميت
كان بكام خشب التابوت
احنا بس نشوف عدالة
رزق ثابت للعمالة
اللى ساكتها طول حياتها
وهى واكلة من الزبالة
عارف انت زهقت منى
بس اسف غصب عنى
قلمى مش بادية صوته
يعنى صعب اقوله غنى
اللى غنا كتير قصادك
استفاد لكن ما فادك
غنى قال ع الفقر جنة
حتى قال ع الناس عبادك
قلمى شاف الموت قريب
والطبيب قال مش حاطيب
يبقى اكتم فين وجيعتى
ولا اطق لواحدى طيب
وانت عارف انى كلمة
كلمة طالعة ف وقت ضلمة
وتلامل فى النور يجيها
تتقرى والدنيا ضلمة
اقسم انى ماليش ميول
حكم ربى انى اقول
ايوة اقول من جوة قلبى
مش حادق معاك طبول
بس حاسكت تانى خالص
لما قلمى يقولى ناقص
حامسكه ف ادية تانى
واطلع احكى للى لايص
احنا اهلى اهو وزمالك
شيعه سنة شافعى مالك
هى دى كل القضية
اللى رايحة للمهالك
#محمد_وفيق_الشطى
ليست هناك تعليقات:
إرسال تعليق