بقلم : جيهان الجارحي
يا ناس يا هوه دلُّوني ، أنا توهت في سكتي
مش عارفة فين طريقي ، هموت بحسرتي
أصرخ في الشوارع ، ما حدِّش ليّ سامع
الناس غير الناس ، قلوب بلا إحساس
الوش غير الوش ، تعبت من ده الغش
ما تقولي يا صديقي ، تعرفش فين طريقي ؟!
تايه في أوطاني ، بادوّر على عنواني
بصيت من بعيد لقيت قضبان حديد
قرّبت عشان أشوف وقلبي كله خوف
الدنيا كانت ضلمة ، بس الناس مش نايمة
سمعت صرير أبواب وصوت أنين وعذاب
سمعت صراخ وعويل وبكاء مُر طويل
وناس زي الوحوش بتضرب بالسياط
ما قدرتش أحوش دمعي وعينيّ من العياط
حاولت كتير أحوش ، ما قدرتش ع الوحوش
سألت انا فين ؟ قالولي إنتي مين ؟!
تايه بلا عنوان بيدوّر ع الأمان
عنوانك مش عندنا ، إمشي أوام من هنا
إنتي هنا في صيدنايا ، صرخت آه يانا
فين المنظمات ؟ قالوا لي دي شعارات
حبر على ورق وكمان كله اتحرق
سألت دي الوحوش ، مين اللي آد النار وهدِّم الديار ؟!
قالولي وطي صوتك ، دي أوامر الجبّار
صرخت بأعلى صوتي ، تعبت من سكوتي !
ألاقي فين عنواني ، أروح كوكب تاني ؟
ورجعت سألت تاني ، زرعتم الإرهاب واللا بتحاربوه ؟!
قالولي لأ يا هانم ، إحنا بنحبوه !
ليست هناك تعليقات:
إرسال تعليق