حاسس بانى حاموت
وكلامى راح يتنسى
يا حبيبتى مات الصوت
مش فارقة مين كان قسى
كان نفسى اخللى الناس
تدوق جمال الحروف
مش شعرى يبقى كابوس
يرسم ف وشك خوف
بازعل معاكى كتير
وارجع واقول ماعلش
بكرة حايصحى ضمير
يمحى الدموع م الوش
سنين العمر بتعدى
وانا باحكى حكاويكى
واقول ارض الهرم ارضى
واقول النيل يموت فيكى
اتارى النيل ف ايامى
خلاص حايموت على حظى
طب ارسم ايه ف احلامى
ولا اديها للترزى
قرفت بجد من شكلك
ومن طعم الهوان فيكى
يا ريت الشكل يشبهلك
ده انتى ومش حاتوه فيكى
سألت كتير وانا مالى
وشاغل نفسى ليه بغيرى
لقيت الحرف ده مالى
وشاغل كل تفكيرى
مانا وانتى قدرنا غريب
مابكتبش الا غير ليكى
ورافضة تحسبينى حبيب
عشان دايما بابكيكى
مانا بابكى كتير واسكت
عشان ماتزيدش اوجاعك
لكنى ساعات يفيض بيه
واقولك بصى لخداعك
فيلم جديد ومتفصل
عشان يطلع على مقاسك
سيناريو عالى متقفل
وملعوب فيه على راسك
يا بلدى هى دى ارضى
وارض ابويا واجدادى
تقولى ازاى ماهيش ارضى
وانا باغى وانا عادى
#محمد_وفيق_الشطى
ليست هناك تعليقات:
إرسال تعليق