بقلم : جيهان الجارحي
لما كنا صغيرين ، كان لينا حلم كبير عايزين نكبر معاه
نفضل ويّاه عايشين
ومرت الأيام ومرت السنين ، واتغير الزمان واتبدل المكان
لقينا روحنا كبرنا ، ودبل الورد في قلوبنا
اتمنينا لو رجعنا من تاني صغيرين
ونعيش حلم الحياة .. لقينا العمر تاه !
فاكرة زهر الريحان والنرجس الفتّان ، فاكرة ضي القمر ، وحكاوي ألف ليلة واللا نسيم السَحَر
أجري ورا الفراش ، وأروي الناس العِطاش
وكأني في الجنة ، ما لحقتش بيها أتهنى
أبني قلاع الرمال.... فوق شط القنال
تيجي رياح الربيع والحلم معاها يضيع !
العمر بينا تاه في رحلة الحياة
ياريت يازماني ترجع بينا تاني
نجدد الأحلام ، نعرف معنى السلام
يامركب بينا هدّي ، نفسي يوم يعدّي
من غير دمعة حزينة ، ولا جرح قلوب أسيرة
هي إيه الحياة ؟ سراب بنجري وراه
هي فين الحقيقة ؟ وحده يعلمها الله
ليست هناك تعليقات:
إرسال تعليق