مافيش وسط الليالى كلام
مادام الخوف مغرقها
خلاص اهدى مافيش احلام
سواد الليل مفرقها
واموت منك اموت فيكى
اموت ليكى لو حكمت
هاتى يالا بس اديكى
وشدى الناس ماهي اتفرمت
ماعدش كلام حاقولك ايه
مافيش فايدة خلاص عدت
وحلمى اللى عشت ابنيه
يادوب كان اوضة واتهدت
قالولى زمان مافيش فايده
يا عم اكتب اغانى وعيش
وانا قلبى بنار قايدة
يولع شمع مايطفيش
اغنى ازاى وانا شايفك
خلاص ضايعة ومش راجعة
وماتخبيش مانا عارفك
عايشة ومن زمان خاضعة
وانا الكلمة بتقتلنى واكتبلك
واقول راح تقرا قبل ما اموت
ويأس مالينى من وضعك
ومش سامع لوجعك صوت
بنيتى فى التاريخ اهرام
ومات البنا من يومها
اما الجاى كله كلام
وناس مش قادرة تفهمها
ياستى انتى التاريخ ماشى
بس الجاى راح منك
وقولتى النيل ده ناجاشى
واهو وقف المدد عنك
طب اكتب واحكى ايه يعنى
وانا شايفك بتنهارى
يا خلق قولولها تسمعنى
ماهى عزوتى ودارى
قولولها ان الهرم مقلوب
وان البنا مات ومافيش
يا دوب يعنى نلم الطوب
واهى شغلة ولقمة عيش
ونستنى نجيب بنا
حتى من بلاد خواجات
لكن عجزوا كما حالنا
وقالوا ان فيه اشارات
يا ريت البنا كان خلف
وكان علم ولاده الرص
ماكانش تاريخ حايتألف
وكان كله دليله البص
يا حاجة محتاجين تعليم
بلا تمثيل بلا كورة
عايزة تعملى التصميم
ولو بحجارة مكسورة
انا ماعرفش باكتب ليه
واعذب نفسي ليه بيكى
وماعرفش الاجابة ايه
ولاقى انى باموت فيكى
عارفة يعنى ايه عاشقك
عشان عارفك بلاد طيبة
ولما كلامى بيضايقك
وقولة الحق مش عيبة
ومش عيب انى اقول حاسبى
وانا شايفك خلاص واقعة
ومش عيب انى اقول ربى
عشان يحموكى م الواقعة
#محمد_وفيق_الشطى
ليست هناك تعليقات:
إرسال تعليق