ايوة انا خايف
اه والله بجد انا خايف
ماشى بقالى سنين وياكى
بس تعبت ليه مش عارف
ليه مابقتش اللمة
الحلوة
جامعة الناس بالليل
على غنوة
ليه مابقاش حد يقول
خير
لما يكب صينية قهوة
ياما انا قولت زمان
ونصحتك
قولت اتانى وامشى
براحتك
ووقت ماحد يقولك قولى
واجهى الناس كلها
بصراحتك
واجهى وقولى العيب
جوانا
بقوا اصحابنا همه
عدانا
واتحجرت الدمعة فى
عيننا
مابقاش فيه احساس
يملانا
وانا بصراحة فاض بى
الكيل
كل كلامنا بقى تمثيل
حتى الضحكة جوة الصورة
طالعة معاكى بدم تقيل
انتى سفينة نجم يا
حلوة
اللى عشانها كتب
الغنوة
اللى اتعذب لجل يقولك
انه فداكى لانك هوه
حتى سرور فكراه بكلامه
لما طهق من كتر غرامه
قالها صريحة بكل وقاحة
لما انكشف العيب قدامه
ولا حاقول على مين او
مين
وانتى حبيبة للملايين
بس الصبح بتوعظى فيهم
وبعد الضهر تسبى الدين
حتى كمان انا شاكك
فيكى
شوفتى وصلنا لاية
باديكى
كله يشك فى بعضه ويشتم
كله بقى تقفيل امريكى
خدنا سلاحنا وقولنا
نحارب
بس الناس اخدوها تجارب
وبدال مايحاربوا
اعاديكى
ضربوا فى بعض الشعب
الخايب
كل خناقة يموتوا شوية
واحد خمسة ساعات
باللمية
علشان عيل ضرب التانى
صبحت جوة سطور فى قضية
وانا والله ماعايز
اتكلم
قولت كتير ولا حد
اتعلم
علشان كده قررت اعيشلك
وابقى معاكى اصم وابكم
مانا خلصت وقلبى وجعنى
من اللى نصفنى وم اللى
خدعنى
حاجة خلاص شلت تفكيرى
هدد قلمى وقال
حايبيعنى
شوفتى خناقة ناس على
عيش
شوفتى المنظر على
الكورنيش
ولا شباب قاعدين فى
قهاوى
يشربوا شيشة عليها
حشيش
لا استنى حاقولك تانى
اشمعنى انا وحدى اللى
اعانى
اسمعى بقى كل اللى
حاقوله
مانتى خرمتى ياما
ودانى
شوفتى الحزن فى وش
جعان
شوفتى القسوة على
الغلبان
شوفتى الطيبة وهى
مسافرة
لما بقينا وحوش وغيلان
لسه استنى حاطلع عينك
ماحنا بقالنا سنين
سايبينك
قولنا تحسى وتعملى
حاجة
بس طلعنا مش همينك
عايز اجيب جورنال فيه
حوادث
وشوفى بعينك تلقى
كوارث
شوفى كام واحد قاتل
اهلة
ومين على ناسك عالى
ودايس
كله جعان الا الحرامية
ولا عاد فول ولا فيه
طعمية
كل الناس مستنيينك
فاكرين ليهم عندك دية
بس حاصلى اكيد وادعيلك
يطلع بدر ينور ليلك
حادعى لقلبى يروق
يتطمن
لما يشوف الضحكة فى
نيلك
ليست هناك تعليقات:
إرسال تعليق