بالنسبه للكمامه
بقلم : فهيم سيداروس
لأننا لو ما خوفناش على أنفوسنا مين ها يخاف علينا .
ولكن لو المواطن موش قادر يجيب الكمامه وقاعد ، ومبطل وعنده خمس ست أولاد فى أقل سعر للكمامه 3 جنيه ، ماذا يفعل ، وهل يصح نهدده بغرامه 4000 جنيه وهوه وراه كوم لحم
عايز يجيب لهم أكل وشرب ماهو لو ما أكلناش برضه هانموت من الجوع يبقى الحكومه تتبرع لنا بموضوع الكمامات وإحنا كلنا نمشى بيها وفى الأماكن إللى هيا محدداها وتقوم بتوزيعها على المواطنين من خلال بطاقة التموين شهريا زى إقتراح الأستاذ مجدى الحلوانى ..
طب ما هتقابلنا مشكله تانيه لو قلنا بطاقه التموين فإن نصف الشعب المصري الغلابه وكأنها مقصوده اتشال منهم التموين هيعملوا ايه .
المطلوب شخص يكون موجود فى المكان إللى من 6 أماكن إللى حددهم رئيس الوزراء ويسلم كل إنسان يدخل لهذا المكان كمامه .
يقول إحدي البشر المرموقين
احنا فى الشغل اشترينا علب كمامات على حسابنا الخاص انا ، واثنين من الافاضل اشتركوا معنا وكل يوم خناقه
والسبب كلفنا امن الادارة بتعقيم خفيف للموظف عند حضوره بالرش بالمطهرات وتسليمه كمامه ببلاش هديه صباحيه على باب الادارة
تصور حضرتك خناقه وصياح علشان رافض التطهير بينتش الكمامه بغضب من العلبه ويضعها فى جيبه وكل يوم على هذا الحال وعند معاتبته يرتديها على مضض وعندما التفت خارجه من مكتبه يخلعها وكاننا نلعب ونهزر وياتى متحججاعايز اجازة عزل خايف عليكم اصل واحد فى العمارة الى ساكن فيها عنده كورونا .
كل يوم حكايات وروايات وكان العند والمكابرة سلوك اصيل معنا .
يافندم بنوزع الكمامات دون ثمن على كل مواطن داخل عندنا بشكوى او طلب خوفا عليه وعلى انفسنا والزملاء الى هما امانه فى رقبتى
وتصور سيادتكم نترك الامر الهام ويكون الصراع موش هارتدى الزفته دى يبقى لايحق لك تهديد امن وصحة الموظفين فى تلك المصلحه ويكون دا شاغلنا وعندما يرضخ يحاول رد الكبت بالبصق على ارض المديريه او الكحه فى الهواء او تعمد الاقتراب من الموظفين من باب العند والاذى وكانه لابد من حراسة تصرفه .
ورأي اخر تقول
ينقصنا الوعى والالتزام بصحتنا والاخرين واحده بتشوى سمك اعطيتها فى المنصورة ٢ كيلو تشويهم وباذنجان ذهبت اليها بعد ساعه وجدت كل شيئ تمام جاهز
ولكن وجدتها وهى تحاسبنى عينيها حمراء ومذكمه وبتدور على الباقى بصعوبه وكحت فى ايدها فكرت لحظه وطلبت منها هاجى تانى بعد شويه وتركت السمك وخلافه ومشيت بلا رجعه
ولم اخذه واتغذينا عيش ناشف وجبنه وسط غضب كل الاسرة بعد يوم عمل شاق لاولادى فى اعمالهم ولكن احساسى ويقينى ان هذا افضل من ان احمل لهم المرض بيدى وان العيش الناشف او الحاف افضل مما كنت اعتزم نقل الفيرس بيدى لاحبابى
حفظكم الله وحفظنا الله يخليكم
كل هذا الاتجاه من ايجاد اعذار نتحمل وزرها المصيبه كبرى الكمامه ممكن شال ممكن ايشارب ممكن كل شيئ الا الاستهتار وايجاد الاعذار والقاء اللوم على الاخرين صحتك واولادك وجيرانك اغلى من ٤٠٠٠جنيه المستشفى والعلاج والحسرة والغلب اغلى من ٤٠٠٠ .
الكمامه او ماشابه حتى لو شال اوايشارب ياجماعه ارجوكم .
كلنا فى المصيبه معا صحتك تهمنى وصحتى تهمك هل نشرب وناكل ويرتاح بالنا كما كنا فى ٢٠١٩ لا طبعا لاطعم لاى شيئ ونعيش الرعب ويارب ارحمنا من عندك لابد من الوعى
الدوله عملت كل شيئ مازالت الكرة معنا ارجوكم توعوا الناس اكثر واكثر
واقول
يادكتور مصطفى كفاكم تهريج وقرارات فاشله
اذا أردت أن تطاع فأمر بما يستطاع كل عامل باليوميه محتاج منك 4000 جنيه من أجل اطعام ولاده وسداد فاتوره المياه و الكهربا والغاز
موش الغرامه لعدم ارتداء الكمامه فيه ناس غلابه لاتملك 10 جنيه تأكل اهل بيتها ياريت تجيبوا انتم الكمامات وتوزعوها علي عامه الشعب و الغلابه والمطحونين 4000 لاختراق الحظر و 4000 لعدم ارتداء الكمامه انتم مفكرنا شغالين في الخليج وراجعين بالدولارات كفاكم قرارات بدون وعي وتتطبق عالغلابه بدون رحمه .
إرحموا من في الارض يرفع عنكم البلاء والوباء من في السماء
