لو شوفتني بارقص
يبقي العيال جاعوا
لو قلمي يوم طبل
يبقي السنين ضاعوا
سنين وانا صابر
والعمر بيعدى
وحقيقي مش قادر
اشوف مصير بلدى
يا نجم فين قلمك
يكتب بتاع تاني
ومات معاك حلمك
وفاتنا بنعاني
واحنا يا دوب كلمة
لناس ولا سامعة
عايشة الحياة ضلمة
ومافيش ولا دمعة
وانا اللي مات حلمي
من قبل ما يزورني
ويا عيني يا قلمي
عارفك حاتعذرني
ماهو لو بإيدى الحلم
مانا كنت حاحلم بيه
لكنه طاله الظلم
وحكمه مش بإديه
يا كل شاعر بكي
دمعه علي ورقه
مسيره يوم يتحكي
حلمك ومن سارقه
سارقه اللي سارق وطن
من كل اولاده
مابقاش سكينة وسكن
في ارض اجداده
جهزت ايدى خلاص
قيدها بحبالك
وياريتها ضرب رصاص
يبقي هنيالك
مع ان عضمي انكسر
وبامشي بالعكاز
لكن قلمي انتصر
وموته كان انجاز
حطوا العلم ع الورق
وع القماش حيوه
وطن خلاص اتسرق
قولولي فين تلاقوه
مانا ياما قلت زمان
حذرت ياما كتير
رديتوا قولتوا امان
وضاع خلاص الخير
بيتك عليه الدور
وشوف لفين حاتروح
ف خيمة من كاستور
لو يعني كان مسموح
جايلك خلاص صهيون
ماهو اشترى ارضك
وكل شئ حايهون
حاسب وصون عرضك
جهزت ايدى خلاص
قيدني بالاغلال
واقتلني واقتل ناس
بكرة الكلام يتقال
عمر الكلام ما يموت
لو حتي صاحبه انتهي
نجيب سرور له صوت
وحايبقي للمنتهي
موتني بس الورق
وديه لناس تقراه
لو حتي جسمي اتحرق
يوصل كلامي مداه
يا بيه خلاص حاتحبس
كلبشت ايدى خلاص
انده يا بيه ع الحرس
واديني ضرب رصاص
اخر الكلام وانتهي
ضاع الامل منكم
سنين باقول وانتهي
مافيش امل منكم
املنا يطلع جيل
يقرا الكلام يفهمه
مايقضيهاش تهبيل
يبقي الزمان علمه
يمسك بايده الوطن
يرجع وطن للناس
والحق يبقي السكن
والعدل يبقي اساس
#محمد_وفيق_الشطي
ليست هناك تعليقات:
إرسال تعليق