بقلم
دكتور: محمد الشطى
قلتى اجرى ..قلت حاضر
قلتى ياللا بسرعة شاطر
شيل هموم الناس وهمك
حط ايدك ف المخاطر
قلت ابكى قلتى عيب
قلت امتى قلتى غيب
ولما بصيت فى المرايا
شعرى مليان كله شيب
عشت فيكى سنين كتير
كنت بحسب كله خير
كل فرحى ايام قليلة
اما جرحى فكان كبير
قلبى مليان بالمواجع
قلت اه ولا حد سامع
لما دمعى غصب عنى
سابنى مرة وقالى راجع
بس اتارى فاض بدمعى
لما ما استحملش وجعى
كنت اصلى وادعى ربى
كنت بافضل يا ما ادعى
قلبى كله جراح وربى
فاض بقلبى ازاى اخبى
كل جرح يعدى اقوى
لما داب م الحزن قلبى
كتفى شال الحمل كله
لما حمله بدأ يشله
حتى شجرك وسط غيطك
خبى عنى حتى ضلك
كنتى نجمة ف ليل سمايا
حتى حبك كان حكاية
حتى فى القران لقيتك
ربى قال اسمك فى اية
انتى مصر بجد ولا
كل خيرك راح وولى
حتى ناسك ايه جرالها
كله حاسس بالمذلة
#محمد_وفيق_الشطى
ليست هناك تعليقات:
إرسال تعليق