قالوا ان الكلام احساس

الشطي

قالوا ان الكلام احساس
ماحستش الا غير بيكى
وبادية اللى ماسكة الفاس
صبح يسرى الخضار فيكى
رويت الزرع بدموعى
ماكفتشى رويت بالدم
وكنتى كل ما تجوعى

مافيش غيرى يشيل الهم
قالولك انى بانساكى
وانى قال مع غيرك

وكنت بدمعى انا باكى
على زرعك..على خيرك
نسيتى الليل فى موالى
وليلتى فى مواويلهم
ويصعب ع الغريب حالى
وانتى كنتى سامعالهم
وكرهت ايدى مسك الفاس
عملت خواجة زييهم
لحد ما جاعوا فيكى الناس
يا ريتك برضه شوفتيهم
فضلت سنين انا وانتى
بتبعدنا اياديهم
وحتى بعد ما فوقتى
حليتى تانى فى عنيهم
وشوفت الموت قصاد عينى
بيقطف من جناينك ورد
زعقت وقولت طاوعينى
ومستنى ماجاش الرد
ماجاش منك ولا كلمة
تفهمنى ان عندك حل
مصيبة تكونى مش فاهمة
لحد اما الحيطان تنحل
وبازعق تانى انا جانبك
انا معاكى لحد ما اموت
ومهما يحاولوا مش سايبك
ومش حاكتم فى قلبى الصوت
كتمت كتير زمان صوتى
عشان خوفى من انيابهم
وقولت بعبطى فى سكوتى
بان الصمت عذبهم
رجعنالك قوام عودى
نفسى تكونى عايزانا
انا وانتى ودى حدودى
وانتى وبس نقصانا