اتسرقت !!!!!

هى الثورة بجد اتسرقت
ولا انا باحلم ولا ده ايه
انا مش حاسس انها فرقت
ضلمة فى ضلمة اللى انا بالاقيه
حسبة بمليون حسبة برمة
وكله حاسبها غير التانى
قصة لو عملوها فى سينما
تطلع فيلم فى ست ثوانى
مات مننا كام الف شهيد
علشان نصبح بنى ادمين

ويوم الوقفة وقبل العيد
سابوا الناس كلها نايمين
عطلت كل ادين شغالة
مابقاش فيه غير الاحلام
بصوا حالتنا صبحت حالة
بادعى تكون كلها اوهام
مليون فكر بنسمع فيهم
اشى اخوانى وسلفى ووسطى
والمشكلة كارهين بعضيهم
حاجة بجد حاتقسم وسطى
شتموا نجيب محفوظ وكلامه
بقى رواياته فجور ودعارة
وعشان كده نوبل قدامه
لما شتم فى ولاد الحارة
والمشكلة تمثال رمسيس
ده حانعتبره من الاصنام؟
متهيالى انها كوابيس
مش موجودة فى الاسلام
ماسمعناش عبدة رمسيس
ولا تحتمس ولا كليوباترا
حاسس انى باقول تهييس
وشايف كلها صبحت حمرة
انا والله تعبت خلاص
كل كلامى كلام فى كلام
حمل وشايله فوق الراس
واللى املكه اوراق واقلام
نفسى اشوفها بجد بهية
لافة الطرحة الخضرة عليها
مش عايزينها يا دوب اغنيه
نرقص ولا فاهمين معانيها
اسالوا عم صلاح وحروفه
رباعياته او اغانية
ياما حذرها زمان من خوفه
وكانوا يجيبوا الحق عليه
حتى كمان عم الابنودى
قالها فصول وعيال ع الارض
فاطمة حراجى جالك عودى
عودى قوام يتوصل الود
لسة كتير جوايا وكاتم
بس كفاية نفهم دول
مصر ماهياش ابدا خاتم
نلبسه او نقلعه على طول

#محمد_وفيق_الشطى