مع السلامة يا امى

مع السلامة خلاص يامه
وبادعى ربنا بالرحمة
وشكل دنيتى بعديكى
راح يبقى بين عتمه وضلمة
خلاص بايدى غطيتك
ولحد قبرك وديتك
ونزلت قبرك قبليكى
ورجعت وحدى على بيتك
ماعلش يامه وسامحينى
دموعى نزلت من عينى
ماهى فرقتك صعبة عليه
يا حضن كان بيدفينى
يا ربى والله انا راضى
وحاجى بعدها فى ميعادى
لكن السنين لما بتمشى
جوانا عايش فى الماضى
يا شمس يا حاسة بجرحى
يا منورة لى طريق صبحى
يا حاسة بيه وفهمانى
للذكرى مش ممكن امحى
يا شمس نزلت على ايدى
ودمها جوة وريدى
وسيبتها وطلعت لفوق
باقول لعينى ابكى وزيدى
مش حاتشوفيها خلاص تانى
والمرة دى البعد انانى
حاستنى ربى يندهنى
وعندها يبقى مكانى
اسالكم الفاتحة لروحها
وادعولها الجنة تروحها
يا رب مايصيبكوش مكروه
م الدنيا ولا كل جروحها
ماتت وسيبانا فى غابة
والناس ديابة فى ديابة
يا حسرة على مصر بلدنا
ويا خوفى على اى غلابة
يا رب رحمة ونور ليها
والجنة تبقى اراضيها
واقابلها واخدها فى حضنى
لما القبور انزل فيها
يا حاجة فاكرك مش حانسى
فاكر كلامك بالهمسة
يا اغلى حاجة فى الدنيا
مش حانسى يامه ولو لحظة
#محمد_وفيق_الشطى