بحبك يا
بلدى بجد وصحيح
بقلبى وروحى بعمى وفصيح
وبازعل يا بلدى لما القاكى ساكتة
سكوتك بيقتل فى قلبى الجريح
بحبك يا بلدى مهما تكرهينى
مهما تهدى فيه وف الشدة تسبينى
بحبك فى زعلى وجرحى وهوانى
وباتمنى انك فى يوم تسمعينى
انا عاشق ترابك مهما شتمت فيكى
مهما فضلت ادور برضه مش لاقيكى
وبالعن ابوكى ولكن بقلبى
باحس فى خيالى انى بابوس اديكى
ومهما قسيتى وضربتى وجرحتى
جوة فى قلبى لساكى حبيبتى
وباتعجب انى مابازعلش منك
وحتى اما احس بعجزى وخيبتى
مانا عارف انك صبرك كبير
وياما قاسينا من صبرك كتير
صبرتى ودمى بيسقى الاراضى
لحد اما زرعك كان يستجير
وحتى اما ادور مالقاش الرغيف
وحتى اما عقلى بيصبح خفيف
اتجنن ولكن استغرب جنونى
بيفضل فى حبك الهادى الضعيف
اه لو تحسى بعشقى وغلاوتك
وحتى فى صبرك كتير او غباوتك
وحتى حروفى لما تكونلك
بتتمنى مرة تكتبلك سلامتك
وحتى اما باطلب فيكى الحياة
وتدينى جايزة شهادة وفاة
ولما باديكى بتدمى الجراح
حبك بيطلع مع كل اه
ليست هناك تعليقات:
إرسال تعليق