ملعون ابوه العشق
لو انتى معشوقة
ما منه غير الشق
والدمعة مخنوقة
وذنبى انى بحبك
واعشق تراب ارضك
نخوة ولاد البلد
وحرصك على فرضك
لكن سكاتك بلا
بازعل عليه وانقهر
يا شيخة وقت الصلاة
ادعى اننا ننتصر
ادعى لقلوب الناس
الرب يهديها
واوعى تسيبى الفاس
وارضك اسقيها
وادعى نفوق لو حلم
مش عايز احلم بيه
وانا باشوف الظلم
ومش بايدى امحيه
يا دوب كلام ع الورق
لا يجيب ولا يودى
يظهر مصيره الغرق
يا اما حاتعدى
عدت كتير قبلها
وحافظ تاريخك صم
وعمرى ماحسب لها\
وحتى لو ف الحلم
انك تكونى الهوى
واكتب علشانك
وف حضنك القى الدوا
وادوب ف احضانك
رغم ان صدفة بقيت
باكتب كلام ينقرا
والله ماتمنيت
ولا كلمة ولا دكترة
ومش بايدكى كمان
ان الكلام ليكى
انا يا دوب انسان
حس الحياة فيكى
م المر خدت كتير
واصبر واقول ماشى
مبقاش يجيب تاثير
باخده وانا ماشى
لسانى حب المر
من كتر ماتعود
طعم الحلاوة مر
ولا المرار زود
لو يعنى زاد ادعي
ان المرار يخلص
صلى كتير وادعى
من قلبك المخلص
وف دعوتك اكدى
يرجع فيه خير وضمير
#محمد_وفيق_الشطى
#الشطى
ليست هناك تعليقات:
إرسال تعليق