محمد وفيق الشطى
لسه اديكى حاسس بيها
بس غريبة ليه الرعشة
كنت باقول دايما قويها
بس بخوفك قاعدة وكشة
عمر الخوف ما يحل الازمة
انما دايما بيزودها
دوسى تكونى انتى الحازمة
اصل الدنيا على ما تعودها
واحنا الخوف زرعوه جوانا
وسهل كلمة كلمة عيب
كبر الزرع لفوق خلانا
واحنا شباب يملانا الشيب
وانا مي نقالك انا مابخافش
انا بالعكس بخاف من بكرة
لحسن حلمى يكون من قش
وبكرة يعدى ويصبح ذكرى
كتم الاهه بيوجع اكتر
يمكن اكتر م الاوجاع
يمكن مرة فى مرة بنقدر
بس وجعنا عمره ما ضاع
انا مش عارف جد ابكيلك
لجل تحسى النار جوايا
مانا من صغري باقول واحكيلك
وعمرى فى يوم ماعرفت دوايا
انا والله الموت ما بايدى
لو باديه لكنت مشيت
كنت قطعت بايدى وريدى
كنت ارتحت انا واتهديت
بس العمر فى ايد المولى
هو وبس اللى مقدرها
يبقي حرام الجرح واولى
شوفى سببها اللى مكترها
ياما كان نفسى اغنى بفرحة
بس ازاى وانا قلبى حزين
نفسى تكونى عروسة بطرحة
لابسه كمان اجمل فساتين
بس انا باصحى الاقى الضربة
وبعد ثوانى اتنين بعديها
فجاة الضربة بتبقي بحربة
وربنا وحده اللى معديها
بس انا بسال وانا مش قصدى
انى اقول ما تخفى جراح
امتى الحلم حايصبح وردى
اصل العمر اهو عدا وراح
عايز بكرة افتح عينى
القى سعادة كتير جيالى
والقى فى عمرى اللى ينسينى
انك ياما هدمتى خيالى
#محمد_وفيق_الشطى
#الشطى
ليست هناك تعليقات:
إرسال تعليق