السكوت كان اصله صوت
بس رافض يتنطق
والسكوت جواه يموت
كل وفكر ومنطلق
وانا قلبى اتعرف بيكى
وقال ع العشق ف عنيكى
وبابعد وارفضك واسكت
الاقى سكاتى كان ليكى
واقول انساكى واعدى
وانسى انساكى واهدى
والاقى نفسى ف النسيان
باموت فيكى ومين قدى
انا الكلمة اللى جاية تقول
واشوف بالعرض مش بالطول
وامسك قلمى عايز اكتب
كلام يمكن يعيش على طول
انا قررت انى اكتب
وقررت انى اعيش واحب
وحتى لو حالومك يوم
كلام حايكون لقلب محب
خلاص شعرى ملاه الشيب
ومتربى بصح وعيب
ولما اكتب اكيد قلمى
حايكتب كلمة من حبيب
قريت حزنك وافراحك
ومين باكى ومين ضاحك
لقيت البلوة صدمانى
وحرفى يبتدى جراحك
يا حضارة سنين وسنين
جاوبينى بقيتى فين
بنتفاخر بماضينا
وننسى احنا نبقى مين
ياللى نيلك شد قلبى
قلت انى افديه وربى
احنا ميت مليون قصادك
يالا فوقى قوام ودبى
عايز اقولك كلمتين
الشباب محبط سنين
وانتى كل وعد ليكى
تسحبيه وتقولى فين
وانتى قلبى وقلبى دب
محتجانى حاقول يا رب
حاكتب اللى تقولى عنه
حتى لو حاتقولى كذب
احنا جوة مقسمين
اى شعب واى دين
حتى ساعة الكورة نبقى
فى خناقات على مين ومين
قلت ان القوة وحدة
نبقى شعب بامة واحدة
كل واحد دينه جوه
بس بره مصر واحدة
هى مصر ومصر تعنى
ف الحلاوة عايز اغنى
واوصف الارض البريئة
اللى شكلى وبتأنى
انتى اقوى بس ياللا
احنا نقدر بالادلة
احنا فرسان القضية
مش بصورة او مجلة
احنا ناس بصين لبكرة
بكرة ممكن يبقى فكرة
والحياة عاشت بفكرة
مين يحب ومين بيكره
#محمد _وفيق_الشطى
ليست هناك تعليقات:
إرسال تعليق