بعد الشعر ما صابه الشيب
بعد سنين باعشق بجنون
فاهمة كلامى بس العيب
لما تقولى ان انا مجنون
ولو مجنون فيه ايه جننى
طبعا عارفة اكيد ان انتى
انا مظلوم والكل ظالمنى
واكبر طعنة ظلم حبيبتى
ياما كتبت زمان فى قصايد
دوستى عليها وقولتى جنان
والقى قساكى وغدرك زايد
وتطبطبى على كل جبان
قلت خلاص مش حاكتب تانى
مانا مابقاش حد بيقرالى
اول واحدة قولتى انانى
مابيكتبش اللى بيجرالى
مانا طقيت م الحاصل فيكى
وانتى مزاجك يعلا الواطى
واللى بيجرا كان باديكى
كان القلم الحر مطاطى
نسمع لت وعجن نسقف
نسمع معنى نسد ودانا
يبقى ادينى الحق انى اقرف
واحنا بنرقص على اوجاعنا
حتى الاكل كمان اتسمم
ولا اتسرطن م المبيدات
والقى خدود واقفة بتتبسم
جوة جنازة واحد مات
طب بالذمة عيب اتجنن
ولا انى اكره كل حياتى
وكل الناس عمالة تفنن
بقى فيه حاوى وفيه قرداتى
هو سؤالى ياللى حاتقرا
مش من حقى اكون مجنون
لما تموت الناس الفقرا
ويعيش فيها اللى يخون
ليست هناك تعليقات:
إرسال تعليق