مش فاهمة الكلام حسيه
وحسى القهر من معانيه
وانا عارف اكيد حاسة
وعادتك
الوجع تنسيه
لما الاهة تصحى الارض
ويدعوا المولى سنة وفرض
وانتى عاملة مش فاهمة
ياخوفى تفرطى ف العرض
وشايفة الجوع ولا حاسة
وطالعة بحوارات فاكسة
مايفدش الجعان ماعلش
يا شيخة روحى بلا وكسة
ماقولنا الوحدة قوتنا
علشان وحدة لسان صوتنا
بلا شيعة بلا سنة
واحنا بننتظر موتنا
لسان واحد بصوت قرأن
كلام بيهز اى ودان
و انتى ن كان عليكى كمان
عايزة تركنى القران
مش جننتى عم نجيب
وكان فنان وقلمه صعيب
ولما لقاها مش بالفن
ابدع فى الكتاب بالعيب
مافيش بيرم مافيش الخال
وراح نجمك مع الابطال
وطلعوا علينا كام واحد
عملوا من الغنا خلخال
مافيش اوزان ولا قافية
ولا حاسس بناس حافية
يا دوب
تمثيل ورص كلام
وناسنا عايشة بالعافية
انا صوتى خلاص بيضيع
مش عايز اخون ولا ابيع
مانا عايش وهى انتى
وغير حبك مافيش مواضيع
يمكن تقرى بعد ما اموت
وقولى كان فيه عندى صوت
حكمت عليه بكتمانه
لحد ما اخره كان ف تابوت
وممكن يترمى ورقي
برغم انه سبب غرقي
ولكن كل شىء ممكن
علشان عرفك بتتسرقى
اخ
حروفى نسيتها خلاص
اكتب ايه مابقاش احساس
مش انتى عاجبك الحاصل
كله اخره نفس الكاس
ماهو حبك الداهية
وسايبة ناسك التايهة
كتبت كتير مافيش فايدة
عرفت القصة منتهية
وانا حالف ماكون رقاص
ولا قلمى يقول وخلاص
ونفسى اكرهك حبة
علشان اعرف اكون هلاس
وانا ماملكش غير قلمى
وجيت فى زمان ماهوش زمنى
رسالتى لناس ولا بتقرا
ولا بيوصل لها قلمى\
بقلم الشاعر محمد الشطى\
#محمد_وفيق_الشطى
#الشطى
#مصر
ليست هناك تعليقات:
إرسال تعليق