يفرح شمتان يفرح عايب
ولا تفرق ويانا مصايب
العيب عينه قوية
بيمد برجله ف أيامنا
ويهد قلوعنا المبنية
ويخلخل صبر الأيام
ويشد الناس للمرازية
كنا بنتمني زمان نحلم
والحلم نعيشه ف أمنية
دلوقت بنصرخ م الواقع
والكل يقول إنه ضحية
ملعونة الدنيا وأيامها
مهما بتدينا ف أحلامها
بتاخدنا ف سكة أوهامها
وتموت فينا الحنية
كام واحد طبطب علي قلبك
أو فرح روحك بهدية
أو قرب منك ف الشدة
واتمنالك عيشة هنية
احنا اللي شربنا المر كاسات
ودموع العين نستنا حاجات
ومشينا بعكاز ملوية
بتشوف الضلمة كأنها نور
والعوج المر كأنه سطور
مرسومة بمسطرة معمية
بطلنا خلاص نعشق بطال
نعمل لمقامكم الف مقال
ونمد لحبل الصبر جبال
ونعيش ف الذل بدون دية
هنعيش ونموت نتمني حاجات
والدنيا تاخدنا لشئ تاني
ملعونة الأيام وسنينها
حرمتنا وخلتنا نعاني
شوف كام واحد عايش ميت
يتمني الفرحة تدق الباب
يتمني يكون انسان تاني
يفضل بالحب كأنه شباب
لكن امتي الدنيا بتدينا
واحنا اللي بنظلم نفسينا
عايشين ف الوحدة بدون احباب
والحب اللي يخبط ع الباب
بنرده ونعمل الف حساب
دا كلام الناس ودا عيب وحرام
ودا لاء ودا نو
طيب ما خلاص الحب بيعوه
بطلوا تحلموا وتغشوا الغير
وتعيشوا الدنيا كأنكوا طير
له ألف طريق ومكان وصحاب
يتحمل حر وبرد وغاب
مغشوش والدنيا تراب ف تراب
هيعيش ويموت وكأنه سراب
وخلاص للحدوتة نهاية
لو هكتب فيك الف حكاية
وهقول عنك الف رواية
انت اللي اختارت تكون آية
والكل يفسر ف حروفك
والحلو يكون مر ف جوفك
لا هخاف من ظلمك ولا غدرك
أصلي اتعودت علي ظروفك
وهربت خلاص من صمت هواك
هتكلم واحكي زماني معاك
والعمر اللي بترويه بجفاك
راح يطرح شوك وألم وهلاك
واتفضل اشرب بكفوفك
ليست هناك تعليقات:
إرسال تعليق