محمد الشطي
مابقاش حضنك بيدفينى
ايه اللى جرالك ردى عليه
انا مش حازعل لو تنسينى
ولو بدلتى حنان بقسية
بس بلاش ارجوكى تهونى
ويضيع منك اجمل معنى
اوعى يا امى بجد تكونى
ناوية تشلى بجد دراعنا
عزت فيكى اللقمة الناشفة
والجعانين بيزيدوا كتير
شايفك ساكته يا امى وواقفة
راضية وصابرة على اللى يصير
عارفة بجد تعبت معاكى
مابقاش فايدة خلاص لكلامى
سمموا فيكى حتى هواكى
وهانت خالص كل الامى
اللى اتظلموا زمان حكمونا
قولنا حايبقى العدل اساس
بس يا ريتهم كانوا سابونا
مش حطونا علشان ننداس
كنت باقول حايراعوا الفقرا
والجعانين حايلاقوا القوت
بس اتارى سيبنا النقرة
علشان ندخل جوة تابوت
ليست هناك تعليقات:
إرسال تعليق