محمد الشطي
احنا ليه
بيعنا القضية
واللحاف والجلبية
واحنا يا اصحاب الوسية
اللى اولى بطرح خيرها
خوفونا ببلطجية
ولا بالناس اللى هى
خلف صوتنا مدارية
يعنى محمية بغيرها
طلعولنا القرشينات
خمسينات او عشرينات
الف تعلب فات ومات
واللى صوت يفتكرها
لا صحيح بعتوا الضماير
بعتوا محصول بالبشاير
واللى خطف الخطفة طاير
لجل ناس باعت ضميرها
اللى عامل نفسه فيها
ان هو قال حاميها
وهو اكبر غلطة فيها
والاكادة كله فاكرها
لاء يا اهلى لاء يا ناسى
قول يا فاكر للى ناسى
قد ايه الظلم قاسى
وقد ايه ممكن يضيرها
الكلام ده صعب لكن
لو سألتوا الاماكن
اللى فيها الفقر ساكن
حتى شرخه راح لزيرها
هى لقمة يعنى ولا
راح نغمسها بمذلة
واللى باع الليلة خللى
الخراب راح يكسى خيرها
ياللى صوتك بعتوا ليهم
حط حلمك بين اديهم
ولما تحتاج حاتلاقيهم
شوك بيتدارى فى حريرها
ياللا قدم وطى راسك
الجنيه عداك وداسك
واللى وقت الفرح باسك
بكرة حايغير مصيرها
بكرة حايكون فيه مزاد
ع الهدوم قول والولاد
ولما حايفوت الميعاد
للى زاد حايكون وزيرها
هى كلمة واسمعوها
تفهموها ما تفهموها
احنا اصلا جوة توهة
توهة شلت خط سيرها
اللى عندى ليكوا قولته
ياللى وقت العزة هونتوا
هم داسوا انتوا دوستوا
المهم نفتكرها
ليست هناك تعليقات:
إرسال تعليق