محمد الشطي
انتى قديمة بجد عتيقة
رامية العالم كله ف ضيقة
كل ما واحد يحلم فيكي
حلمه يموت جواه ف دقيقة
ايوة بحبك بس استنى
اللى يحبك مش بيغنى
اللى يحبك راسمك جوه
حب ملوش ف الدنيا معانى
مانا جواكى ودايسة عليه
سايبة سنينى تكسر فية
واكتب وانا تعبان علشانك
وماتملكش المعنى ادية
عاشق كل كنيسة وجامع
عاشق حتى حوارى الشارع
م الجمالية باقول من تاني
حد يا عالم فيكم سامع
حبة ف حبة النيل بيروح
وحاتتكلم مش مسموح
يبقي اتنيل اقعد جانبى
لما انا اندب انت تنوح
احنا بنشحت تمن اللقمة
مش شايفين غير عالم ضلمة
واللى جعان بكرة حايتعرا
مش طالبين غير بس الرحمة
وزى ماقالها الخال بالحب
احنا ولاد الكلب الشعب
لما الدنيا بتقسي علينا
عارفين بس بندعى الرب
هو العالم بالمظلوم
عمره ما داس على رزقنا يوم
هو حايحكم بينا بعدله
ومافيش ظلم كتير بيدوم
واسمعوا منى يا كل الساسة
انا انسان ماعرفش سياسة
اعرف بس احس الحالة
لما احس الناس منداسة
#محمد_وفيق_الشطي
#الشطي
ليست هناك تعليقات:
إرسال تعليق