محمد الشطي
كل ما دق
القلب يا بلدى
باحسه بيهتف ويقول مصر
حاسه بحجم غلاوتك عندى
لما حياتى تكونلك مهر
وسط اخواتى وقفت عشانك
قولنا نموت وتعيشى عظيمة
رغم الخوف حسينا حنانك
راح الخوف بقى كله عزيمة
وافتحى قلبى تلاقى النيل
ماشية فروعه مكان شرايينى
واحلم لما بييجى الليل
انى فى حضنك وبتحمينى
حتى يا مصر اخواتى الشهدا
قدموا روحهم فدا احلامك
نزل الدم وطرحت وردة
وده عنوان تغيير ايامك
ياما الظلم حنى لنا الراس
كنا بنسكت كلنا خوف
حتى كلامنا فى الكراس
كنا بنحذف منه حروف
عارفة ازاة الظلم بيوجع؟
وجعه يزيد عن ميت كرباج
كان الطفل وهو بيرضع
يرضع خوف من شكل التاج
بس خلاص قررنا نثور
ونقول مصر حاتفضل حرة
واللى بيحجب عنا النور
هو يسيبنا ويطلع برة
كده يا حبيبتى خلاص متطمن
كده مايهمش انى اموت
كل مأذنك بكرة حاتدن
مش راح تكتم تانى الصوت
ليست هناك تعليقات:
إرسال تعليق