محمدالشطى
قولتله سين
قام قاللى الصين
قولتله جاوب يخرب بيتك
قالى ياعم واجيبه منين
لما اقلامك دى من الصين
حتى كلامك حتى سكاتك
حتى الفول والموز والتين
كله بييجى عليك م الصين
يبقى اجاوب اقولك ايه
خايف ابنى فى يوم الاقيه
تقصر قامتة
وتديق عينه
وبنتى القاها تبقى اوشين
مش فالحين غير فى المصاصة
وكيس الشيبس والدماسة
ومابننتجش يا ناس كراسة
ده انا حاتجن يا بنى ادمين
يبقى السين اجابتها الصين
عملوا فانوس غنا لنا كرومبو
وكلنا الوجبه كمان الكومبو
حتى كمان هيفنا الجامبو
وعملناها فراخ وسمين
علشان نرضى الاخت الصين
عملوا بلاستيك غنى لجيشنا
خدوا ببساطة يا ناس تحويشنا
واحنا نغير شكل وشوشنا
ونرسم بالالوان خطين
مابلاش رغى يا عم وخيبة
يا اهل بلدنا والله دى عيبة
لما نصدر يوم لاعيبة
وناكل لقمة عيش بالدين
مابنعرفشى غير فى الكورة
ياللى عيونكم صبحت عورة
ركزوا بصوا قوام فى الصورة
تلقوا الدلتا حاتبقى بكين
ليست هناك تعليقات:
إرسال تعليق