هو انتى ليه بتقصدى
تاخدى الحبيب منى
لو ع العناد اعندى
مش فارقة اكمنى
شوفت الجراح كلها
ولسه مفتوحة
وتمللى بتزودى
واحسب يخيب ظنى
**
قالوا النواح م البكا
لما يزيد المه
لا بيرحم اللى اشتكى
ان الزمان ظالمه
ولا اللى كاتم حمول
وف قلبه مدفونة
وبتخلص المعركة
وكله فى الضلمه
***
كان عندى قلب زمان
عايش فى حلم جميل
يا دوبه عاش فرحان
من صغره وقت قليل
عرف الدموع بدرى
ومن وقتها شايل
ولو تحسبى الاحزان
حاتلقى فاض الكيل
***
انا اللى صوتى انكتم
جوايا من خوفى
واندم واعيد الندم
وتبصى وتشوفى
ماعرفش ايه يرجعك
تدينى جرح جديد
وبرضه اجيكى بعشم
وتبعترى حروفى
***
عرفت اكتب دموع
وتسيل على الورقة
واغير الموضوع
والقاها مش فارقة
كل الحروف تتنسج
على نولى تطلع خوف
لو ع الشبع والجوع
انا راضى بالدقة
***
خايف لا بكره الجاى
يطلع يضيع العيش
نقطع ورقنا فى شاى
ناكل ومايكفيش
ونموت من الحسرة
على شكل اولادنا
قالوا فى الرياضه الفاى
مجموعة فيها مافيش
***
نزل الكلام ع الورق
زهق القلم منى
وقالى حبرى اتحرق
حاول تطمنى
ضحك الورق ع القلم
وقاله انا اللى باشيل
شكل الدموع والعرق
وبرضه ظالمينى
****
انت بتكتب كلام
يخلص وبتعدى
يفضل سايبلى ظلام
على سطر كان فضى
توجعنى كل الحروف
حتى حروف الفرح
وشايله شوف من كام
وعندى امل وردى
****
رغم الكلام مجنون
تايه معايا كتير
يصيب ساعت ويخون
والحلم ياكله الطير
بس الجنون حكمته
والا ما عشنا
ولا لقينا عيون
ولا عشقنا الخير
***
ايه اللى انا باكتبه
كله فى اخره سطور
تقراها ما تحسبه
ولا تلاقيله ظهور
بجد انا اتجنيت
ايوة بقيت مجنون
ولو ع الجنان اندبوا
اصل الجنان بالدور
****
يا نجم حلمك معاك
عشته وصدقته
ومشيت ولا استناك
ولا بعنيك شوفته
ماتقولى يعنى انساه
يووووه
ميت الف رحمة عليك
سبحانه من سواك
مر الكلام عيشته
****
ولا يا شهدى نجيب
ابوك كاتبلك ايه
كتب كلام تعذيب
وفى كل وقت لاقيه
عايش معانا ومات
اصل الكلام حاصل
عملوه من المجاذيب
ولا همه ابن الايه
****
كفاية اصلى نسيت
كان الكلام على ايه
مش قولت انا اتجنيت
انا فين وامتى وليه
هو الكلام اخرته
ندعى لرب الكون
يديم علينا الحيط
نمشى فى حماه نحاذيه
***
ماملكش الا كده
يا مصر سامحينى
ضعيف لابعد مدى
والاه بتكوينى
وباحلم يا ست الناس
القاكى ست الكل
ونعيش فى اشيا رضا
وانتى تضمينى
****
#محمد_وفيق_الشطي
ليست هناك تعليقات:
إرسال تعليق