محمد الشطي
خايف حلمى يموت جوايا
ويموت كل كلامى معاه
والقى الهم كأنه مرايا
واشوف نفسى دموع جواه
اصلى تعبت خلاص مش قادر
شايف عمرى الجاى بيضيع
واللى يخونك يصبح شاطر
وتعظمى قوى للى يبيع
واحنا دفعنا عشانك دم
واسالى حتى تراب اراضيكى
سال فى الحرب وسال فى السلم
كان يتمنى فى يوم يرضيكى
بس خسارة نسيتى شبابك
احلى ورود جوة البستان
حتى الثورة شافت شهدا
ثايرة وباسم الله بتسبح
وبتدعيلك ترتاح ارضك
والسجان يفتح للناس
بس تحسى بالمى فى عرضك
ولا خلاص مابقاش احساس
شايفة الليل بقى شكلة مخيف
حتى البدر بيهرب منه
بقى شىء والله بجد سخيف
مابقاش حد بيحسن ظنه
علشان كلمة موت بتقرب
ولا نعرفش القاتل مين
والتقارير بتقول متكهرب
رغم الضرب شمال ويمين
وانا شكيت بصراحة فى عينى
قولت ياجوز مابشوفش كويس
لما الرعب قتللى سنينى
وبقيت وقت الجد باهيس
حتى الثورة نسيت معناها
مانا مش لاقى جديد بعديها
كل الناس بتجوع وياها
واللى بيقدر بيعديها
نفسى اقول مبروك يا بلدنا
انك تانى رجعتى قوية
يفرحوا بيكى كل ولادنا
ويغنولك قوى يا بهية
بس تحسى قوام وتثورى
واقطعى كل ادين بتخون
واعملى دورك واعمل دورى
لجل تنورى كل الكون
ليست هناك تعليقات:
إرسال تعليق