محمد الشطي
لما يتعب صوتى تلقى
الكلام مخنوق فى حلقى
تلقى بكرة المستخبى
جاى برضه وناسى حقى
ولما باضحك وتشوفينى
كل ضحكة بشىء كاوينى
لما ابص والاقى ناسك
دمهم بقى دم صينى
حتى صوتهم فيه هزيمة
صوت مافيهش اه سليمة
واللى يشكى وجعه لاطرش
يبقى صوته مالوهش قيمة
سيبت فاسى فى داهية بورى
مانتى عشتى سنين تجورى
تدى ناس ماتستحقش
يبقى روحى فى داهية غورى
مش باطيق سيرتك ولكن
بالقى عشقك فيه ساكن
حتى وانا بالعن غباوتك
القى عشق فى قلبى راكن
ارض مصر الطيبة فيها
بس ظلم الناس ماليها
لوم على اللى الغدر فيهم
واوعى ييجى اللوم عليها
ياما سكتت ايوة عارف
لما كان الزرع ناشف
والشقوق فى الطين بتصرخ
هو نيلنا ماعدش شايف
قالوا سد النهضة حوسة
والامور ماهى ماشية كوسه
الله يرحم لما كانوا
م الادين يتمنوا بوسة
ولا دولة فى حجم شبرا
عاملة فيها علينا خبرة
لمت الاخوان فى جيبها
عاملة بيهم دولة قادرة
محتاجين القلب يصفى
والعليل مسيرة يشفى
بس لما الغل يرحل
ترحل الاوجاع وتصفى
ليست هناك تعليقات:
إرسال تعليق